മുത്തശ്ശിമാവും മുത്തച്ഛന്‍ പ്ലാവും.

ഇന്നു നാം ഏറ്റവുമധികം കുട്ടികളോട് സംസാരിക്കുന്നത് പ്രകൃതിയെക്കുറി       ച്ചാവും. പിന്നെ നാട്ടുരുചി, നാടന്‍കല, നാട്ടുപഴമ... ഇങ്ങനെ നാടന്‍ സംസ്‌കൃതിയുടെ ഉള്ളറകള്‍ തേടിയുള്ള               പ്രഭാഷണങ്ങള്‍, സെമിനാറുകള്‍...               എല്ലാം സ്‌കൂളുകളില്‍ സമൃദ്ധമാണ്. സാംസ്‌കാരിക സംഘടനകളും പ്രമുഖ പത്രങ്ങളും ചാനലുകളുമെല്ലാം പ്രകൃതിപാഠങ്ങളെ വിദ്യാര്‍ത്ഥികള്‍ക്കു പരിചയപ്പെടുത്തിക്കൊണ്ടേയിരിക്കുന്നു. 2014 അന്തര്‍ദേശീയ കുടുംബക്കൃഷി വര്‍ഷമായി പ്രഖ്യാപിച്ചതിനു പിന്നാലെയാണ് മലയാളത്തില്‍ അസാമാന്യമായ പരസ്യ പ്രഖ്യാപനത്തോടെ 'ഹൗ ഓള്‍ഡ് ആര്‍ യു' എന്ന സിനിമ ഇറങ്ങുന്നത്. മുന്‍പേ വിവിധ മുനിസിപ്പാലിറ്റികളും കോര്‍പറേഷനുകളും കൃഷിവകുപ്പും ചാനലുകളിലെ കൃഷിപാഠ എപ്പിസോഡുകളും പ്രചാരം നല്‍കിയിരുന്നു കുടുംബ/മട്ടുപ്പാവ് കൃഷി ഇതോടെ ഒന്നുകൂടി ജനകീയമായി. എന്നാല്‍  ഓരോ കാലത്തെയും ട്രെന്‍ഡ് എന്ന ആവേശത്തിനപ്പുറം ഈ ആശയങ്ങളെ അതിന്റെ എല്ലാ സുതാര്യതയോടെയും സത്യസന്ധതയോടെയും അടുത്ത തലമുറയ്ക്കു സംവേദനം ചെയ്യാനാകുമോ എന്നതാണ് പ്രസക്തമായ ചോദ്യം. അതിനുള്ള ശ്രമമാണ് ശാസ്ത്രസാഹിത്യ പരിഷത്ത് പ്രസിദ്ധീകരിച്ച പ്രൊഫ.എസ്.ശിവദാസിന്റെ 'മുത്തശ്ശിമാവും  മുത്തച്ഛന്‍ പ്ലാവും' എന്ന ബാലസാഹിത്യഗ്രന്ഥം. പ്രൈമറിക്ലാസ് വിദ്യാര്‍ത്ഥികളെ ഉദ്ദേശിച്ചെഴുതിയ ഈ പുസ്തകത്തില്‍ കഥ പറയുന്ന മട്ടില്‍ കാര്യം പറയുന്നു. അനുഭവങ്ങളുടെ പാഠങ്ങള്‍ കഥകളിലൂടെ പകര്‍ന്ന് കൊടുക്കുന്ന മുത്തച്ഛനും മുത്തശ്ശിയും എന്ന നഷ്ട കാല്പനികതയെ ഇവിടെ തിരിച്ചുകൊണ്ടുവരുന്നു. ഈ കൊച്ചു പുസ്തകം, മണ്ണിന്റെ, പ്രകൃതിയുടെ അനന്തങ്ങളായ അറിവുകളെ കുട്ടികളുമായി ബന്ധിപ്പിക്കുകയാണ്. ഒറ്റയ്ക്കും കൂട്ടായും അവര്‍ക്കു ചെയ്യാവുന്ന നിരവധി പ്രവൃത്തി പാഠങ്ങള്‍, കൃഷിയെക്കുറിച്ചുള്ള പാട്ടുകള്‍ എന്നിവ അനുബന്ധമായി ചേര്‍ത്തിരിക്കുന്നു. കഥയ്ക്കിടയില്‍ വേര്‍തിരിഞ്ഞ് പലനിറത്തില്‍ കൊടുത്തിരിക്കുന്ന അറിവുകളുടെ കളിയോടൊപ്പമുള്ള കാര്യത്തിന്റെ ഗൗരവം നല്‍കുന്നുണ്ട്. ഇങ്ങനെ കുഞ്ഞുങ്ങള്‍ക്ക് മണ്ണിനെക്കുറിച്ച് കൃഷിയെക്കുറിച്ച് സമഗ്രമായ അറിവുകള്‍ പകര്‍ന്നു നല്‍കുന്നു മുത്തശ്ശിമാവും മുത്തച്ഛന്‍ പ്ലാവും.    

ഹേമമാലിനി