സംഘടനയുടെ ഇടപെടലുകള്‍ ഈ രംഗത്ത് വലിയ ചലനങ്ങള്‍ സൃഷ്ടിച്ചിട്ടുണ്ട്. ശാസ്ത്രസാഹിത്യം സാധാരണ ജനങ്ങളില്‍ എത്തിക്കുന്നതില്‍ മാത്രമൊതുങ്ങുന്നതല്ല ആ ദൗത്യനിര്‍വഹണം. മലയാളവൈജ്ഞാനികസാഹിത്യത്തിലൂടെ ഭാഷ യ്ക്ക് നല്‍കിയ സംഭാവനകള്‍ വളരെ വിപുലമാണ്. ഒട്ടേറെ ശാസ്ത്ര സാഹിത്യകാരന്മാരെ കണ്ടെത്താനും പരിശീലിപ്പിക്കാനും കഴിഞ്ഞു. വിവിധ ഘട്ടങ്ങളിലുള്ള വിദ്യാഭ്യാസപാഠ്യപദ്ധതിയെ പരിപോഷിപ്പിക്കാനുള്ള സാഹിത്യനിര്‍മാണം, ഫിക്ഷന്‍രചനയില്‍ ഉണ്ടാക്കിയ മാതൃകകള്‍, പുതിയ വിജ്ഞാനശാഖകളെ പരി ചയപ്പെടുത്തല്‍, പരിസ്ഥിതിസംരക്ഷണത്തിനും ആരോഗ്യസംരക്ഷണത്തിനും ഉതകുന്ന വിവരശേഖരങ്ങളുടെ വ്യാപനം സ്ത്രീപദവി-ശക്തീകരണപഠനങ്ങള്‍ എന്നിങ്ങനെ ഇനി യും ഒരുപാട് കാര്യങ്ങള്‍ എണ്ണിയെണ്ണി പറയാനാകും. സംസ്ഥാനവാര്‍ഷികത്തോടനുബന്ധിച്ച് പ്രസിദ്ധീകരിക്കുന്ന സോവനീര്‍പുസ്തകങ്ങളുടെ സവിശേഷതയെപറ്റി ഈ ലക്കത്തില്‍ ഒരു പ്രത്യേകലേഖന മുള്ളതുകൊണ്ട് അതേക്കുറിച്ച് കൂടുതല്‍ പറയുന്നില്ല.
അച്ചടിയുടെ കാലം കഴിഞ്ഞുവെന്നു പറയുമ്പോഴും പരിഷത്ത് പുസ്തകങ്ങള് സാധാരണ മാര്‍ക്കറ്റി ലൂടെ കൂടിവരുന്ന പുസ്തകങ്ങളേക്കാളും വളരെയധികം വിറ്റുവരുന്നു. ഈ വര്‍ഷവും രണ്ടരക്കോടിയിലധികംരൂപയുടെ പുസ്തകം പരിഷത്തിന് പ്രചരിപ്പിക്കാനായി. 25 പുതിയ പുസ്തകങ്ങള്, 25 പുതിയ പതിപ്പുകള്‍, 8 ലഘുലേഖകള്‍ എന്നിവ ഈ വര്‍ഷം പ്രസിദ്ധീകരിച്ചു. പുസ്തകവായനയില്‍ നിന്ന് കേരളീയസമൂഹം പിറകോട്ടുപോയി എന്ന അഭിപ്രായപ്രകടനത്തിന് ആധാരം പലപ്പോഴും സര്‍ഗാത്മകസാഹിത്യപുസ്തകങ്ങളുടെ വില്‍പനയെ അടിസ്ഥാനപ്പെടുത്തിയുള്ള ആലോചനകളായിരുന്നു. വൈജ്ഞാനികസാഹിത്യവായനയില്‍ കഴിഞ്ഞ കാല്‍നൂറ്റാണ്ടായി മുന്നേറ്റമാണ് ഉണ്ടായിട്ടുള്ളത് എന്നതാണ് പരിഷത്തിന്റെ അനുഭവം. ശാസ്ത്രസാഹിത്യപുസ്തകങ്ങള്‍ വാങ്ങിവായിക്കുന്ന പുതിയ തലമുറക്കാരുടെ എണ്ണം പുതിയ പാഠ്യപദ്ധതി നടപ്പിലായതോടെ വര്‍ധിച്ചിട്ടുണ്ടതെന്ന താണ് വസ്തുത.
21-ാം നൂറ്റാണ്ടിലെ ലോകവൈജ്ഞാനികവിശേഷങ്ങള്‍ക്കൊപ്പം മലയാളത്തെ നടത്തുന്നതില്‍ ശാസ്ത്രസാഹിത്യപരിഷത്തിന്റെ നേതൃത്വത്തില്‍ നടത്തിയിട്ടുള്ള അക്കാദമികപരിശ്രമങ്ങള്‍ ഒട്ടുംചെറുതല്ല. പരിഷത്തിന്റെ പുസ്തകങ്ങളെ സ്വീകരിക്കുന്നതില്‍ രക്ഷിതാക്കളും മുതിര്‍ന്ന വായനക്കാരും ഇന്നും ഏറെ തല്‍പരരാണ്.
പുതിയകാലത്ത്, പുസ്തകപ്രസാധനം മാത്രം പോര. ഇ-വായനയുടെ സാധ്യതകള്‍ ശാസ്ത്രസാഹിത്യപ്രചാരണത്തില്‍ ഉപയോഗപ്പെടുത്തേണ്ടതുണ്ട്. അതിനാവശ്യമായ പ്രായോഗികപദ്ധതികള്‍ രൂപീകരിക്കാന്‍ കഴിയണം. പുസ്തകപ്രസിദ്ധീകരണത്തില്‍ നാല്‍പതുവര്‍ഷം പിന്നിടുമ്പോള്‍ ശാസ്ത്രസാഹിത്യപരിഷത്തിന് അഭിമാനിക്കാനുള്ള ഏറെ വകയുണ്ടെന്ന് പറയട്ടേ.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ